Gjendet vazo 2400-vjeçare, në brigjet e Butrintit

Ekspedita nënujore

Një vazo e 2400-vjeçare greke është gjetur pak ditë më parë në brigjet përballë Butrintit, nga ekspedita e parë nënujore në këtë zonë. Vazoja duket se është pjesë e një ngarkese me 60 enë qeramike dhe sipas zbuluesve është pjesa më e rëndësishme e gjetur nga ekspedita e organizuar nga ekspertë të SHBA-ve dhe shqiptarë, që për herë të parë eksplorojnë këtë zonë. Sipas Xhorxh Rob, që drejton misionin, vazoja është bërë para se të lindë Platoni dhe është një gjetje e rrallë. Misioni ka filluar në korrik të këtij viti dhe është i pari që tenton të bëjë një hartë të trashëgimisë kulturore të flotave të mbytura në 220 miljet e bregdetit shqiptar. Auron Tare, që është koordinatori lokal i projektit, tha se autoritetet shqiptare kërkonin të nënshkruanin një marrëveshje 5-vjeçare me fondacionin amerikan, i cili vepron si organizatë jofitimprurëse. Duke folur për agjencinë e lajmeve “Associeted Press”, Tare thotë se kjo ekspeditë do të jepte një dorë të mirë ndihme për një fushë të arkeologjisë ende jo-ekzistente në vend. “Do të ishte një reklamë mjaft e mirë për turizmin lokal dhe mund të na çojë në krijimin e një muzeu arkeologjik të nënujshëm”,- thotë Tare për AP. Arkeologu Adrian Anastasi thotë se ekspedita do të ndihmojë në mbrojtjen e pasurive nënujore të vendit nga grabitjet, një problem në rritje që prej shembjes së regjimit komunist. Amfora me një ngjyrë të lehtë kafe, duket se është përdorur për të mbajtur vaj ose verë, ajo u gjet në ujërat pranë Butrintit dhe është datuar në shekullin e 4-t Para Krishtit. Vazoja do të mbahet e zhytur në ujë, në muzeun e Durrësit, ndërsa punëtorët e këtij të fundit do i heqin asaj kripën, për ta bërë më rezistente.