Enver Hoxha: "Ja pse është armik Beqir Balluku!"

Arkiva. 30 akuzat e Enverit për "Tezat e Zeza"të Beqir Ballukut e gjeneralëve "armiq"

Është korriku i vitit 1976. Prej muajsh, sipas dokumenteve zyrtare të kohës, në krye të Ministrisë së Mbrojtjes së Shqipërisë, është shfaqur dukshëm konflikti midis ministrit Beqir Balluku dhe zëvendësit të tij, njëkohësisht Shef i Shtabit të Përgjithshëm të Ushtrisë, Petrit Dume. Për këtë shkak, ky konflikt në dukje si tentativë për të siguruar rolin primar në krye të Mbrojtjes e njëkohësisht si "kartë besimi" ndaj Enverit, Hysniut e Mehmet Shehut, fsheh diçka më të rëndësishme. Në materialin e Tezave të Këshillit të Mbrojtjes, fshehtas, bashkërisht e në mënyrë individuale(nga Beqir Balluku, Petrit Dume, Hito Çako, Rrahman Parllaku etj...), hartohet një material tjetër që kundërshton Tezat zyrtare të miratuara nga Këshilli i Mbrojtjes dhe Komandanti i Përgjithshëm Enver Hoxha. Sipas dokumenteve zyrtare të Arkivave të Shtetit(Fondi 14, Lidhja 1, Dosja 1), Enver Hoxha e bashkëpunëtorët e tij më të afërt(Kapo e Shehu), në ballafaqimet Beqir Balluku-Petrit Dume, kanë mësuar se kontradiktat mes dy krerëve të Mbrojtjes janë jo teknike, por parimore. Ky fakt i raportohet Enver Hoxhës direkt nga Beqir Balluku. Zbulohet kështu "komploti", hartimi i shtesave në Tezat e Këshillit të Mbrojtjes nga Beqir Balluku e njerëzit(gjeneralë) të tij më të afërt, gjë që alarmon Enver Hoxhën e Byronë Politike. Ata (Enver-Hysni-Mehmet), shpejt arrijnë në konkluzionin se ndodhen para një "grupi armiqësor" që duan të hartojnë strategji tjetër të mbrojtjes së vendit, "strategji revizioniste", puçiste, që duan të ndryshojnë udhëheqjen e kursin politik të Shqipërisë.

Ky material i hartuar nën drejtimin e Beqir Ballukut, si cilësuar më vonë si "Tezat e Zeza", merret në analizë nga Enver Hoxha. Në këtë rast(sipas dokumenteve zyrtare të kohës), Enver Hoxha, në rolin e specialistit kompetent ushtarak, merr materialin (Antitezat) dhe për çdo pikë të tij, bën shënimet përkatëse, që më vonë shërbejnë si argumente për pushkatimin si "armiq" të Beqir Ballukut, Petrit Dumes, Hito Çakos, e ndëshkimit me dhjetëra vjet burg të pothuaj gjithë gjeneralëve e kuadrove më të lartë të Ushtrisë Popullore.

Më poshtë, shkëputur nga arkiva e KQPPSH, ((Fondi 14, Lidhja 1, Dosja 1), jepen të plota vërejtjet e Enver Hoxhës(me shkrimin e tij) rreth "Tezave të Zeza" që shërbyen si argument kryesor për ndëshkimin ekstrem të "puçistëve" në ushtri".

Ja dokumenti i plotë arkivor

(Vërejtje të Enverit për "Tezat" e armiqve):

Në faqen 1: Në materialin armiqësor thuhet: Në vetë Tezat e Këshillit të Mbrojtjes ka trajtime të cilat nuk përputhen me kërkesat e parimet e Artit Ushtarak popullor...

Lidhur me këtë, shoku Enver ka shënuar:"Ç'thonë këta! Tezat nuk përputhen me Artin Ushtarak Popullor? Domethënë këta po na propozojnë Teza të reja(të tyret) që të përputhen! Domethënë sipas tyre, ne që kemi bërë Tezat jemi në kundërshtim me vetveten?!"

Në faqen 2: Në materialin armiqësor thuhet …. Përgatitja e kundërsulmit dhe kundërgoditjes si forma më e lartë e aktivitetit të mbrojtjes…. Shoku Enver thotë: "Ne sipas tyre e kemi pas harruar zhvillimin e aktivitetit të Mbrojtjes! Mirë që na e kujtojnë, se do të kishim rënë në greminë! Këta na venë në gojën tonë pikëpamje të gabuara që i kanë në kokën e tyre.

Tezat janë aq të qarta dhe të drejta, sa s'kanë nevojë për koment, pse çdo "sqarim" mund të bëjë të errët idenë".

Në faqen 4: Në materialin armiqësor, në germën "b", gjoja është cituar shoku Enver, i cili ka shënuar: "Nuk i përgjigjet mendimit tim fraza që kanë nxjerrë nga konteksti i gjatë i fjalimit tim në Plenum. A mos duan vallë që duke përdorur thëniet e mia të drejta(mendoj unë), të maskojnë tezat e tyre të rrezikshme? Kështu duket, por nuk i lejojmë ta bëjnë këtë mashtrim.

Në faqen 5: Enveri shkruan: "Drejt i kanë përcaktuar Tezat si mbrojtjen pozicionale, si kundërsulmin e kundërgoditjet. Antitezat e tyre janë të dënueshme, kur i nxjerrin këto nga më kryesoret të fazës së lartë të luftimit. Ushtrinë tonë moderne duan të na e kthejnë që tash në çeta partizane".

Në faqen 6:- Në materialin armiqësor thuhet që kundërsulmi dhe kundërgoditja nuk mund të jenë forma më e lartë e aktivitetit të mbrojtjes sonë. Shoku Enver, për këtë pikëpamje shkruan: "Krejtësisht të gabuar!"

Në faqen 7: Ku thuhet se kundërsulmet i angazhojnë forcat tona në luftë e beteja të mëdha, shoku Enver shënon: "Na çuditin…Nga i kanë nxjerrë këto teori që janë false edhe për shkencën borgjeze, pa le më për tonën.!? Ç'disfatë! Këta hiqen si njerëz ushtarakë të ditur, por ato që kanë lexuar i kanë mësuar së prapthi".

- Në materialin armiqësor thuhet të lihen diversantët të zbarkojnë e të lënë hapësira. Lidhur me këtë mendim armiqësor, shoku Enver shkruan: "Këtu të çon ideja e tyre e gabuar që luftën e mendojnë si një farë loje shahu, spontane".

Në faqen 8: - Ku bëhet fjalë mbi format e ekzistencës së aktivitetit të mbrojtjes…, shoku Enver shkruan: "Idetë e tyre të gabuara janë të qarta, ato shprehen për t'ju kundërvënë Tezave të drejta të Këshillit të Mbrojtjes!"

Në faqen 9:- Ku parashtrohet teza armiqësore e ndryshimeve në ndërtimin e Mbrojtjes…, shoku Enver shënon: "Këtë, natyrisht e mendojnë ata, se janë jo vetëm kundër në parim, por edhe në zbërthim, në ndërtimin e Mbrojtjes dhe të formave të luftimit. Këtu, më duket mua(pa lëre ç'llomotisin) refuzojnë mbrojtjen në front të rregullt, këtu janë për lëshim territori armikut, këta kërkojnë t' na e bëjnë ushtrinë rrush e kumbulla".

Në faqen 10:- Ku flitet se lufta në front të rregullt dhe lufta partizane ndryshojnë midis tyre, etj., shoku Enver thotë: "Çfarë, dy qëllime! Një qëllim!"

Në faqen 11:- Në materialin armiqësor flitet për epërsitë e forcave e mjeteve kundër forcave të armikut. Shoku Enver shkruan: "E kthyen në luftë partizane!"

Në faqen 12:- Ku shkruhet për pamundësinë e krijimit të epërsisë kundër armikut të pykëzuar në mbrojtjen tonë, shoku Enver Hoxha shkruan:"Atëherë, sipas tyre, "e kemi kot këtë ushtri të rregullt që kemi krijuar e stërvitur", sepse sipas tyre, me të as vendin nuk e mbrojmë, as armikun nuk e ndalim, as e kundërsulmojmë! Kot lodhemi. Sipas tyre, le t'i hyjmë luftës partizane. Këta s'janë fare në të!"

-Në materialin armiqësor thuhet se dhënia e goditjeve të mundshme, nuk bazohet në Tezat e Këshillit të Mbrojtjes, lidhur me këtë shoku Enver Hoxha thotë: "Nuk është e vërtetë. Bazohet që ç'ke me të dhe është kryesore!"

-Aty thuhet se epërsia dërmuese kundër armikut superior nuk mund të krijohet; shoku Enver shkruan: "Ka qenë superiore në mësymjen e fillimit, por jo më vonë, pasi e kemi rraskapitur e sidomos po të mos kemi shkuar në "mal", ku kërkojnë!".

Në faqen 13:- Në materialin armiqësor thuhet se kundërsulmet e kundërgoditjet janë veprime të detyruara nga armiku; shoku Enver Hoxha shënon: "S'është e vërtetë. Armiku mund të ketë pasur një epërsi në një moment, ne kemi stabilizuar gjendjen dhe sulmet e kundërsulmet i përgatisim ne dhe e detyrojmë atë të mbrohet. Ai na "detyroi vetëm të bëjmë luftë, se na sulmoi!".

- Në material flitet sikur sulmet e kundërsulmet i gozhdojnë forcat tona në luftime të mëdha e të zgjatura; lidhur me këtë shoku Enver Hoxha pyet: "Pse të zgjatura?"

- Aty thuhet se kundërsulmet tona nuk mund të jenë të rrufeshme; shoku Enver ka shkruar: "Atëherë del qartë se sipas këtyre strategëve pesimistë ne nuk na mbetet përse të jemi të "rrufeshëm, marksistë-leninistë, trima", por kur vjen puna "Tua mbathim këmbëve". Këta janë mburravecë me fjalë, pesimistë në brendi, disfatistë që pa filluar lufta. Kështu paraqiten "teoricienët" e famshëm.

Në faqen 14:- Ku bëhet fjalë për mbrojtjen pasive etj; shoku Enver shënon: "Këta janë demagogët e dembelizmit!"

(Vijon nesër)

Jetëshkrimi

Kush qe Beqir Balluku
Beqir Balluku lindi më 14 shkurt 1917 në Tiranë. Studioi në Shkollën Teknike të Tiranës. U përfshi në lëvizjen komuniste qysh gjatë kohës që kryente shërbimin ushtarak në Tiranë (Vitet 1940 ‑ 1942). Më 20 maj 1943 u caktua komandant i batalionit partizan "Krujë Ishëm"; më 18 shtator 1943 u emërua komisar i brigadës së tretë dhe më pas komandant i Brigadës së Dytë. Më 28 janar 1948 ishte emëruar kryetar i Shtatmadhorisë së Ushtrisë. Kreu në Moskë Akademinë Ushtarake "Voroshillov". Në kongresin e parë të PKSH‑së u zgjodh anëtar i Byrosë Politike dhe në vitin 1952 ministër i Mbrojtjes Popullore. Një vit më pas mori gradën më të lartë në Shqipëri, atë të gjeneral leitnantit. Balluku ishte gjithmonë deputet i Kuvendit Popullor. Në korrik të vitit 1974 ai u akuzua si organizues i veprimtarisë puçiste ushtarake. U dënua me vdekje dhe u pushkatua më 5 nëntor 1975 për tradhti të lartë ndaj atdheut. Eshtrat ju gjetën në vëren e vitit 2001.

Nesër do të lexoni:

-Vërejtjet në vazhdim të Enver Hoxhës rreth Tezave të "Puçistëve", si argumente për veprimtarinë armiqësore të Beqir Ballukut e mbështetësve të tij.

-Si synonte Beqir Balluku, Petrit Dume, Hito Çako e bashkëpunëtorët e tyre më të ngushtë që nëpërmjet revizionimit të Tezave të Këshillit të Mbrojtjes të rrëzonin udhëheqjen e PPSH-së e të shtetit shqiptar.

-Kë përcakton Enver Hoxha mes krerëve të Ministrisë së Mbrojtjes si përgjegjës për veprimtarinë "armiqësore" në dëm të Ushtrisë Popullore e sovranitetit të Republikës Popullore Socialiste të Shqipërisë.

Në materialin e Tezave të Këshillit të Mbrojtjes, fshehtas, bashkërisht e në mënyrë individuale(nga Beqir Balluku, Petrit Dume, Hito Çako, Rrahman Parllaku etj...), hartohet një material tjetër që kundërshton Tezat zyrtare të miratuara nga Këshilli i Mbrojtjes dhe Komandanti i Përgjithshëm Enver Hoxha.

Ata (Enver-Hysni-Mehmet), shpejt arrijnë në konkluzionin se ndodhen para një "grupi armiqësor" që duan të hartojnë strategji tjetër të mbrojtjes së vendit, "strategji revizioniste", puçiste, që duan të ndryshojnë udhëheqjen e kursin politik të Shqipërisë.

Ky material i hartuar nën drejtimin e Beqir Ballukut, si cilësuar më vonë si "Tezat e Zeza", merret në analizë nga Enver Hoxha. Në këtë rast, Enver Hoxha, në rolin e specialistit kompetent ushtarak, merr materialin (Antitezat) dhe për çdo pikë të tij, bën shënimet përkatëse, që më vonë shërbejnë si argumente për pushkatimin si "armiq" të Beqir Ballukut, Petrit Dumes, Hito Çakos, e ndëshkimit me dhjetëra vjet burg të pothuaj gjithë gjeneralëve e kuadrove më të lartë të Ushtrisë Popullore.