G.G.Marquez

Gabriel Garsia Markez: “Ju përshëndes, miqtë e mi!”Testamenti shpirtëror i shkrimtarit të madh kolumbian Në qoftë se Zoti do të harronte për një çast se jam një marionetë e ndërtuar prej rreckash dhe më falte një copë jete, ndoshta nuk do të thosha të gjitha ato që mendoj, por është e sigurtë se do të mendoja të gjitha ato që them këtu. Do t’u jepja vlerë sendeve, jo për atë që vlejnë, por për atë që janë në të vërtetë.. Do të flija më pak, do të ëndërroja më shumë, pasi për çdo minutë që mbyllim sytë humbasim gjashtëdhjetë sekonda dritë. Do të vazhdoja kur të tjerët ndalonin, do të zgjohesha kur të tjerët flinin. Do të dëgjoja kur të tjerët flisnin dhe sa shumë do të më shijonte një akullore me çokollatë! Në qoftë se Zoti do të më dhuronte një copë jetë, do të vishesha thjesht, do të shtrihesha përmbys në diell, duke lënë zbuluar, jo vetëm trupin tim, por edhe shpirtin. Zot, në qoftë se do të mundja, do të gdhendja urrejtjen time në një copë akulli dhe do të prisja të dilte dielli. Do të pikturoja me një ëndërr të Van Gogut sipër, në yje një poezi të Benedetit dhe një këngë e Sherat-it do të ishte serenata që do t’i dhuroja Hënës. Do të vadisja me lotët e mia trëndafilat, për të ndier dhembjen prej gjembave të tyre, por edhe puthjen e kuqe të petaleve të tyre... Zoti im, në qoftë se do të kisha një copë jetë... Nuk do të lija të kalonte asnjë ditë pa u thënë njerëzve se dashuroj, se i dashuroj. Do të bëja çdo burrë e çdo grua të besonin se janë të dashurit e mi dhe do të rroja i dashuruar me dashurinë. Njerëzve do t’u tregoja se sa gabim bëjnë kur mendojnë se pushojnë së dashuruari kur plaken, pa kuptuar se plaken kur pushojnë së dashuruari! Fëmijës së vogël do t’i jepja flatra, por do ta lija që të mësonte të fluturonte vetë. Të moshuarve do t’u tregoja se vdekjen nuk e sjell pleqëria. Mësova kaq gjëra prej jush, njerëzve... Mësova se të gjithë duan të jetojnë në majën e malit, pa ditur se lumturia e vërtetë gjendet në mënyrën se si zbret shtegun e thepisur. Mësova se kur fëmija i porsalindur shtrëngon në pëllëmbën e vet të vogël për herë të parë, gishtin e babait të tij, e robëron atë përjetë! Mësova se njeriu ka të drejtën të shohë tjetrin nga lart vetëm kur duhet ta ndihmojë për t’u ngritur. Janë kaq të shumta gjërat që munda të mësoja prej jush, por me të vërtetë nuk do të më shërbejnë shumë, sepse kur do të më mbajnë të mbyllur në këtë valixhe, për fat të keq, do të vdes... Të thuash gjithmonë atë që ndien dhe të bësh gjithmonë atë që mendon. Në qoftë se sot dija se do të ishte hera e fundit që do të të shihja që po fle, do të të përqafoja fort dhe do t’i lutesha Zotit të mundesha të bëhesha ylli mbrojtës, rojtari i shpirtit tënd. Në qoftë se sot do të dija se ishte hera e fundit që të shihja të dilje nga porta, do të të përqafoja dhe do të të jepja një të puthur dhe përsëri do të të thërrisja që të të puthja, të të puthja,të të puthja. Në qoftë se se do të dija se kjo do të ishte hera e fundit që dëgjoja zërin tënd, do ta inçizoja çdo fjalë tënden që të kisha mundësi t’i dëgjoja e t’i dëgjoja e t’i dëgjoja. Po të dija se këto do të ishin çastet e fundit që të shihja, do të thosha se të dashuroj dhe nuk do të shtoja, se ti e di ndërkohë. Ekziston gjithmonë një e nesërme dhe jeta na jep mundësi të tjera për t’i bërë gjërat ashtu siç duhet, por në rast se bëj gabim dhe na ngelet vetëm e sotmja, do të doja të të thosha se sa shumë të dashuroj dhe se kurrë nuk do të të harroj... Të nesërmen nuk e ka të siguruar askush, qoftë i ri, qoftë plak. Sot mundet të jetë dita e fundit që sheh njerëzit që do. Për këtë, mos prit më, bëje sot, sepse, nëse e nesërmja nuk vjen kurrë, sigurisht do të pendohesh për ditën që nuk gjete kohë për një buzëqeshje, një përqafim, një puthje dhe ishe shumë i zënë për të bërë realitet një dëshirë të tyre të fundit. Mbaji ata që i do pranë teje, pëshpëritju sa shumë i ke nevojë, duaji dhe sillu me ta mirë, gjej kohë t’u thuaj “Më fal”, “Më falni”, “Ju lutem”, “Faleminderit” dhe të tjera fjalë dashurie që di. Asnjë nuk do të të kujtojë për mendimet e tua të fshehta. Kërko nga Zoti forcën dhe mençurinë për t’i shprehur. Tregoju miqve të tu se çfarë janë ata për ty. Dërgojua këtë mesazh të gjithëve atyre që dëshiron. Në qoftë se nuk e bën sot, nesër nuk do të jetë si dje. Dhe në qoftë se nuk e bën kurrë, nuk ka gjë. Fillo të bësh realitet ëndrrat e tua. Tani është koha!