Vajzat shqiptare, makijazh i ekzagjeruar

Sallonet e bukurisë në Shqipëri gjithnjë e më shumë po frekuentohen nga vajzat e reja dhe adoleshentet, dhe të gjitha tentojnë të bëhen më të bukura. Megjithë bukurinë e freskinë natyrale, në jetën e përditshme, atyre u është bërë 'zakon'tualeti

Make up me tonë të forta

Gjithnjë tentojmë te dukemi të bukura, natyrale, të freskëta dhe për këtë në ndihmë na vjen make up-i. Po shumë herë, të paktën në Shqipëri, makijazhi është shndërruar në një lodër me të cilën luajnë vajzat e reja dhe nga një pjesë e madhe e tyre, përdoret në mënyrën e gabuar.

Sallonet e bukurisë gjithnjë e më shumë po frekuentohen nga vajzat e reja dhe adoleshentet, dhe të gjitha tentojnë të bëhen më të bukura. Megjithë bukurinë e freskinë natyrale, në jetën e përditshme, atyre u është bërë 'zakon'tualeti.

Pjesa më e madhe nuk mund të dalin nga shtëpia pa makijazh dhe pa u lyer. Sigurisht që ai në këtë rast nuk është thjeshtë një mjet për t'u zbukuruar, por një mënyrë e shpejtë për të rënë në sy, për t'u dukur apo për të tërhequr vëmendjen. Ai duhet të jetë i rëndë dhe me të gjitha ngjyrat e mundshme të hedhura mbi sy, buzë e fytyrë.

Tone të rënda dhe buzët e 'skuqura'nga buzëkuqi janë një karakteristikë e përbashkët e pothuajse të gjitha adoleshenteve të kryeqytetit. Dhe vendi më i mirë për të shfaqur 'bukurinë'e tyre është shkolla, apo gjatë pasditeve rrugët dhe lokalet e Bllokut.

Ky makijazh i rëndë dhe tonet e forta dhe të ekzagjeruara është i ngjashëm me ato të modeleve dhe prezantueset e ekranit të vogël e të madh, por aspak i përshtatshëm për moshën e tyre, për jetën e përditshme, dhe sidomos ambientit shkollor.

Ajo që është më e rëndësishme për të pasur një makijazh perfekt duhet që make up-i t'i përshtatet linjave të fytyrës, të ndiqni këshillat e specialistëve si dhe të tregohet kujdes me tendencat e fundit të kozmetikës.

Ndërkohë që një nga elementët më të rëndësishëm për të pasur një make up perfekt është të lyheni sipas moshës që keni, këshillë kjo që nuk merret aspak parasysh nga adoleshentet shqiptare.

Të nxitura nga dëshira për t'u dukur dhe për të tërhequr sa më shumë vëmendjen vajzat e reja shqiptare duket se kanë gjetur mënyrën e gabuar për t'u zbukuruar.